რობერტ კობლიაშვილი ევროპის ჩემპიონია, წურწუმია და ქაჯაია ბრინჯაოს პრიზიორები
საქართველოს ბერძნულ-რომაული სტილით მოჭიდავეთა ნაკრებმა რუსეთის ქალაქ კასპიისკში დაწყებულ ევროპის ჩემპიონატის პირველ საფინალო დღეს 3 მედალი მოიპოვა.
ევროპის ჩემპიონი რობერტ კობლიაშვილი (87 კგ) გახდა, გადამწყვეტ ბრძოლაში რუსეთის წარმომადგენელ ბეკხან ოზდოევს აჯობა 3:2. ფინალის გზაზე კი სამი მეტოქე ბულგარეთის ნაკრების წევრი ტარეკ მოჰამედი (5:1), შვედი ზაქარიას ბერგი (2:1) და ბელარუსი ნიკიტა კლიმოვიჩი (8:0) ჩამოიშორა.
ბრინჯაოს მედლები ევროპირველობის დებიუტანტნა ნუგზარ წურწუმიამ (55 კგ) და მძიმეწონოსანმა იაკობ ქაჯაიამ (130 კგ) მოიპოვეს. წურწუმიამ რუსეთის ნაკრების წევრ ვასილ ტოპოევს დაძაბულ ბრძოლაში მომგებიანი ფრით (6:6) აჯობა, ბრინჯაოს მედლისთვის ქაჯაია ბულგარელ მიროსლავ მეტოდიევს დაუპირისპირდა და ხუთი უპასუხო ქულა აუღო.