საქართველოს ჭიდაობის ეროვნული ფედერაცია

საქართველოს ჭიდაობის ეროვნული ფედერაცია NATIONAL WRESTLING FEDERATION OF GEORGIA

ლილოს დასახლებაში ახალი ჭიდაობის დარბაზი გაიხსნა
01:59 | September 27 2015

თბილისის მერმა დავით ნარმანიამ, განათლების, სპორტისა და ახალგაზრდულ საქმეთა საქალაქო სამსახურის უფროს გიორგი არეშიძესთან ერთად, ლილოს დასახლებაში ახალი, რეაბილიტირებული სპორტული კომპლექსი გახსნა.

 

სპორტული კომპლექსის მშენებლობა 2008 წელს დაიწყო, თუმცა სამშენებლო სამუშაოების დასრულების შემდეგ ექსპლუატაციაში არ შესულა,  რამაც ინფრასტრუქტურის განადგურება გამოიწვია. 2015 წელს კი ქალაქის ბიუჯეტიდან  200 000 ლარი გამოიყო და შენობის სრული რეკონსტრუქცია-რეაბილიტაცია განხორციელდა.

 

თბილისის მერის დავით ნარმანიას განცხადებით, სპორტული კომპლექსი თანამედროვე სტანდარტების შესაბამისად გაკეთდა .

 

„ჩვენმა წინამორბედებმა, როდესაც მიხვდნენ, რომ არჩევნებს აგებდნენ  ეს დარბაზი დალეწეს და ძალიან მძიმე ფორმაში დაგვახვედრეს. სწორედ ამიტომ ჩვენ ამ დარბაზის აღდგენა თავიდან ბოლომდე მოგვიწია. ეს  ძალიან მნიშვნელოვანი ადგილია, სადაც  ბევრი ოლიმპიური და მსოფლიო ჩემპიონი გაიზარდა, ამიტომაც ჩვენ მივიღეთ გადაწყვეტილება მის სრულ აღდგენასთან დაკავშირებით. აღვჭურვეთ ის თანამედროვე მოწყობილობებით, ინვენტარით, გავაკეთეთ გასახდელები და ყველა პირობა შევუქმენით ბავშვებს“, - განაცხადა დავით ნარმანიამ.

 

საერთაშორისო სტანდარტების შესაბამისად მოწყობილ კომპლექსში 600 კვ.მ ზომის სპორტული საჭიდაო და მინი ფეხბურთის მოედანია განთავსებული. დღეიდან გაუმჯობესებულ პირობებში  300 - მდე სპორტსმენი და მოზარდი შეძლებს ვარჯიშს.

 

„წლების განმავლობაში დედაქალაქში პრობლემას სპორტული ინფრასტრუქტურის არარსებობა წარმოადგენდა.  სწორედ ამ პრობლემის მოსაგვარებლად ჩვენ გადავწყვიტეთ აღნიშნული ობიექტის რეაბილიტაცია უმოკლედ ვადებში ჩაგვეტარებინა . მერიის სპორტის სამსახურმა შესაბამისი გადაწყვეტილება მიიღო და  აღნიშნული დარბაზის რეაბილიტაცია მოხდა, რომელიც ნამდვილად შეუწყობს ხელს ჭიდაობის განვითარებას, რათა მომავალში ჩვენი ქვეყანა  საერთაშორისო ასპარეზზე უფრო ღირსეულად წარსდგეს“,- განაცხადა განათლების,  სპორტისა და ახალგაზრდულ საქმეთა საქალაქო სამსახურის უფროსმა  გიორგი არეშიძემ.

 

ღონისძიებას დაესწრო ჭიდაობის ფედერაციის პრეზიდენტი მანუჩარ კვირკველია.

 

თბილისის მერიის მიერ დაფუძნებული ააიპ. ,,სპორტული ცენტრი ლილო’’ ლილოს დასახლებაში 107-ე სკოლის მიმდებარე ტერიტორიაზე მდებარეობს.  მერია ცდილობს  გარეუბნებში მცხოვრები მოსახლეობისთვის სპორტის სახეობები ხელმისაწვდომი გახადოს, რაც ჯანსაღი ცხოვების წესის პოპულარიზაციას ისახავს მიზნად.

http://tbilisi.gov.ge